تونس دولة تونسية
لغتها تونسي ، و علمها تونسي ونشيدها تونسي و غرامها تونسي ، حلالها وحرامها تونسي ، مشمومها تونسي وإمشومها تونسي و فنها تونسي وعفنها تونسي وكفنها تونسي . إلي يتولد فيها تونسي ولي يتدفن فيها تونسي وقدّ ما تعمل فيّ ديمة نبقى تونسي مهما صار ما صار و تونس نحبّها هي هي و جاري الذي ينسنس عليّ و زميلي الّي عالغلطة يستنّى فيّ و جزّار الحومة الّي يغشّ فيّ و عرفي الّي ديما يخرنن عليّ و قدّ ما تعمل فيّ. ديمة نبقى تونسي مهما صار ما صارو تونس نحبّها هي هي واللبن إلي شطرو ماء تونسي والبقلاوة بالكاكوية تونسية والشرش شلوق براني في النشرة الجوية والحضرة والمزاودية وآه من ريحة الملوخية والطابونة والبريكة واللبلابي وسلاطة تونسيةو قدّ ما تعمل فيّ. ديمة نبقى تونسي مهما صار ما صار و تونس نحبّها هي هي وحماة الحمى معششة فيك و فيّ .الحايك والفوطة والسفساري و تريكو فضيلة هي لبسة المرأة التونسية... أنا تونسي إمتع الرشة زهر ونسري في القهيوة العربي التونسية و قدّ ما تعمل فيّ.ديمة نبقى تونسي مهما صار ما صارو تونس نحبّها هي هي ومحلى العيشة في الجبّة تونسيّة و الشاشيّة تونسيّة و صبّان الماء في النهج باش العزيز يرجع تونسي و ربع الكابوسان الّي نتقاسموه تونسي تونسي ، و قصّان الضو والماء على غفلة تونسي و قشور الدلاع في البحر تونسيّة و قدّ ما تعمل فيّ. ديمة نبقى تونسي مهما صار ما صارو تونس نحبّها هي هي تونس في قلبي و في عينيّ ، تونس ياسمينة بلديّة و وشمة بربريّة .يا فاهم إفهمني وكل شي يتبدل وتقعد الجنسية تونسية
ليست هناك تعليقات:
إرسال تعليق