Translate

الجمعة، يوليو 25، 2014

‏اللي ليك ليك واللي خاطيك خاطيك‬ تونس في قلب



اليوم انا في الكرهبة راجعة للدار من سوسة للمكنين وفي مفترق ثكنة مسجد عيسى ... ثمة شوية سيركولاسيون و على جنبي اليمين فاتتني كميونة جيش بطريقة اني نشوف مليح الجنود و الظباط اللي فيها و هوما زادة يشوفوني... الكل هازين سلاحهم في يديهم ... انا في المكيف مروحة و نخمم على العشا و هو في كميونة تخض فيه لابس كومبا و هازز سلاحو تحت الشمس و شابب للجبل ... عيني جات في عينو ... عمتلو إشارة النصر و دموعي هبطت ... ضحكلي ضحكة خو لخوه و سلم عليا بيدو...
ربي يرجعكم منصورين
نسألو رواحنا شكون يخدم في الجيش؟ شكون يقاجي في العسكر؟
زوالي و نيتو صافية... على خاطر كان جا خبيث راهو يبزنس في عجوزة في الحمامات و لا يلوج في حرقة للطليان... ولا يخدم في التهريب و يبيع المازوط متاع الدزاير. ..
جنودنا كي في القازرنا يعملولهم عشا بالقدا يفرحو بيه و يغنيو على تونس و على التراب الوطني و السيادة و امن الشعب... الجندي و لا ظابط الصف يبدى يقانص في اللاهي باللباس باش يدبرلو برودكان كوري على خاطرو ارتح... على خاطر كي يقعد بيه برشا الجلدة تتنحى مع الكلاسط...
نقولو عليهم جنودنا و احنا ماناش حاسين اللي ثمة عايلات في الارياف و الدشر تستنى فيهم باش يروحو يخلصو كريدي العطار و يحكي مع المعلمة متاع ولدو و يهز امو للسبيطار و تفضلشي حويجة تشري مرتو صندال للصيف...
احنا ماناش حاسين ببعضنا ... ماناش حاسين ببلادنا تضيع منا...
الجندي احنا جبنالو الارهاب اللي قتلو! باش؟ باللامبالاة و بكلمة عاد شبيه... و بكلمة اسمعوا منا و لا تسمعوا عنا... بنهارت اللي مات عقيد في الروحية و احنا ما خرجناش ... بنهارت اللي سكتنا على وزراء تنظر لﻹرهاب و تتطالب بالذهاب لسوريا... نهارت اللي انتخبنا نائب يعتبر اللي هو في صلح الحديبية و اللي فتح تونس جاي ... بنهارت اللي سكتنا على شخص قال الجيش موش مضمون... بنهارت اللي سكتنا على دعوات القتل و قلنا تهويل و تفليم... نهارت اللي سكتنا على قتل الداعية التونسي لطفي قلال... نهارت اللي قبلنا بالتفاوض على دم البراهمي... بنهارت اللي سكتنا على حكومة سمحت بمؤتمر أنصار الشريعة بسكرة في 2011...نهارت اللي سمحنا بتواجد مدارس تخريب عقول اولادنا ...نهارت اللي سكتنا بعد ما حرقو قبب السيدة و السيد... نهارت اللي الإعلاميين متاعنا اغرقونا بدعوة كل من يرفض الدولة و القانون... عاد شبيه حرية شخصية. .. حرية تعبير...
احنا شعب عاد شبيه و نورمال... و شنوة المشكل... نرمال
الارهاب اليوم عايش معانا و يقتل في اولادنا... اللي مصبرني هو انو
البلاد هاذي فيها قلوب صافية مازالت تحبها... مازالت ثمة عباد تخمم في تونس قبل ما تخمم في قراية الاولاد في امريكيا و دار في باريس باش كي يكمل يخربها يروح لبلادو و يخلينا نعانيو ....
الجيش و الامن مهما كان و مهما لقاو فيهم مرتشين اللي لازم يتحاسبو... يقعدو ولاد الشعب وحراسو ... هوما متاعنا و هوما ظهوراتنا و هوما اللي لينا ... السياسيين منهم اللي متاعنا ومعانا و منهم برشا اللي متاع بلدان اخرين خاطينا...برشا منهم ماعندهمش ديار في تونس... برشا من اصحاب النوايا الخبيثة عندهم اقامات و جنسيات في اروبا.... و احنا مع الجيش و البوليسية هانا هوني في تونس ... و منا اللي يخدمو في الخارج و يجيبو لتونس يبنيو و يعمرو ..‬ تونس في قلب.‏اللي ليك ليك واللي خاطيك خاطيك.
‬ 

هناك تعليق واحد:

شركه تنظيف يقول...

http://youchefayla.blogspot.com/